நீங்கள் தேடியது "இலவச அரிசி"

புதுச்சேரி:

புதுவை சட்டசபையில் கேள்வி நேரத்தில் நடந்த விவாதம் வருமாறு:-

அன்பழகன்:- புதுவை மாநிலத்தில் ஆட்சி அமைந்தது முதல் எத்தனை மாதம் இலவச அரிசி வழங்கப்பட்டது? எத்தனை மாதம் வழங்கப்படவில்லை? அரிசி வழங்காத மாதத்தில் வங்கி மூலம் மக்களுக்கு அரிசிக்கான தொகை வழங்கும் திட்டம் உள்ளதா?

அமைச்சர் கந்தசாமி:- எங்கள் ஆட்சி அமைந்தது முதல் கடந்த ஏப்ரல் வரை 12 மாதத்திற்கு இலவச அரிசி வழங்கப்பட்டுள்ளது. 12 மாதத்திற்கு வழங்கவில்லை. இலவச அரிசிக்காக மாதத்திற்கு சுமார் ரூ.15 கோடியே 88 லட்சம் செலவாகிறது.

அன்பழகன்:- பட்ஜெட்டில் இலவச அரிசிக்காக ஆண்டுதோறும் நிதி ஒதுக்குகிறீர்கள். அதற்கு பிறகு ஏன் இலவச அரிசி வழங்க முடியாமல் போகிறது?

கந்தசாமி:- ஏழைகளுக்கு மட்டும்தான் இலவச அரிசி வழங்க வேண்டும் என கவர்னர் கூறுகிறார். இதனால் அனுப்பும் கோப்பு சென்று திரும்புகிறது. இதனால்தான் அரிசி வழங்க முடியாமல் போகிறது. இந்த மாதம் முதல் அரிசியை வழங்க நடவடிக்கை எடுக்கப்படும்.

அன்பழகன்:- இலவச அரிசிக்காக ரூ.216 கோடி பட்ஜெட்டில் ஒதுக்கி உள்ளீர்கள். அரிசி போட முடியாவிட்டால் வங்கியில் பணமாக போடலாமே?

கந்தசாமி:- பணமாக கொடுத்துவிட்டால் சாராயகடை, மது கடைகளுக்குத்தான் போகும். அதனால்தான் பணமாக கொடுப்பதை தவிர்க்கிறோம்.

பாலன்:- கோப்புகளை ஏன் கவர்னருக்கு அனுப்புகிறீர்கள்? உச்சநீதிமன்றமே கோப்புகளை அனுப்ப வேண்டாம் என சொல்லி விட்டதே?

அனந்தராமன்:- கோப்புகளை கவர்னருக்கு அனுப்ப தேவை கிடையாது. நீங்களே முடிவெடுங்கள்.

பாலன்:- கவர்னருக்கு கோப்புகளை திருப்பி அனுப்பும் அதிகாரம் கிடையாது. நிலை உத்தரவு மட்டும்தான் பிறப்பிக்க முடியும். கருத்து வேறுபாடு ஏற்பட்டால் மத்திய உள்துறைக்கு அனுப்புங்கள்.

கந்தசாமி:- நடைமுறையில் உள்ள சிக்கலைத் தான் தெரிவிக்கிறோம். இந்த மாதம் முதல் மாதந்தோறும் இலவச அரிசி வழங்க உரிய நடவடிக்கை எடுக்கப்படும். இவ்வாறு விவாதம் நடந்தது.

இதைத்தொடர்ந்து காங்கிரஸ் உறுப்பினர் பாலன், சிகப்பு ரே‌ஷன் கார்டுகளை மஞ்சள் கார்டாக மாற்றியுள்ளனர். அவர்களுக்கு இலவச அரிசி வழங்குவதில்லை. கார்டுகளை மாற்ற எந்த அதிகாரி உத்தரவு பிறப்பித்தார்? என கேள்வி எழுப்பினார்.

இதற்கு பதிலளித்த அமைச்சர் கந்தசாமி, ரே‌ஷன்கடை ஊழியர்கள் மூலமாக ஆய்வு செய்ய உத்தரவிட்டு இருந்தோம். அந்த ஆய்வின் அடிப்படையில் சிகப்பு ரே‌ஷன் கார்டை மஞ்சள் கார்டாக மாற்றியுள்ளனர். புகார்கள் வந்ததால் கார்டுகளை மாற்றும் பணியை நிறுத்திவிட்டோம். மாற்றப்பட்ட மஞ்சள் கார்டுகளுக்கும் இலவச அரிசி வழங்கப்படும் என தெரிவித்தார்.

திருச்சிற்றம்பலம்:

திருச்சிற்றம்பலம் பகுதியில் உள்ள அங்காடிகளில் கடந்த 2 மாதங்களாக ரேசன் அரிசியின் அளவு குறைத்து வழங்கப்படுவதாக பட்டுக்கோட்டை வட்டவழங்கல் அதிகாரியிடம் பொதுமக்கள் நேரில் புகார் மனு அளித்தனர். அதில் அவர்கள் கூறியிருப்பதாவது:-

தஞ்சை மாவட்டம், திருச்சிற்றம்பலம் தொடக்க வேளாண்மை கூட்டுறவு சங்க நிர்வாகத்தின் கீழ் 8 முழுநேர அங்காடிகளும் 9 பகுதி நேர அங்காடிகளும் செயல்பட்டு வருகின்றன. இவற்றின் மூலமாக குடும்ப அட்டைதாரர்களுக்கு அரிசி, கோதுமை, சீனி, பாமாயில், மண்ணெண்ணை உள்ளிட்ட அத்தியாவசியப் பொருட்கள் விநியோகம் செய்யப்பட்டு வருகிறது.

இந்நிலையில், கடந்த 2 மாதங்களாக திருச்சிற்றம்பலம் பகுதிகளில் உள்ள அங்காடிகளில் வழக்கமாக வழங்கப்படும் ரேசன் அரியை வழங்காமல், அளவு குறைத்து வழங்குவதாக பொதுமக்கள் புகார் தெரிவித்துள்ளனர். அதாவது ஒரு ரேசன் கார்டுக்கு 20 கிலோ அரிசியும் வறுமைக் கோட்டிற்கு கீழ் வாழும் மக்களுக்கு சிறப்பு திட்டத்தின் கீழ் 35 கிலோ அரிசியும் வழங்கப்பட்டு வருகிறது.

ஆனால், கடந்த 2 மாதங்களாக 20 கிலோ அரிசிக்கு பதிலாக 17 கிலோவும், 35 கிலோவுக்கு பதிலாக 30 கிலோ அரிசியும் வழங்கப்படுவதாக கூறப்படுகிறது. ஆனால், அலைபேசிகளில் குடும்ப அட்டைதாரருக்கு 17 கிலோவிற்கு பதிலாக 20 கிலோவும் 30 கிலோவிற்கு பதிலாக 35 கிலோ ரேசன் அரிசியும் எஸ்.எம்.எஸ். வந்துள்ளன. இதுபற்றி அங்காடி விற்பனையாளரிடம் கேட்டால் ரேசன் அரிசியினை அரசு குறைவாக அனுப்பி உள்ளதாக கூறுகின்றனர். கொடுக்கப்படும் அளவிற்கு ஏற்ப குறுந்தகவல் அனுப்பாமல் கூடுதலாக ரேசன் அரிசி வழங்கியதாக வந்த தகவல் பற்றி கேட்டால் உரிய பதில் இல்லை.

எனவே, இனியும் தாமதிக்காமல், திருச்சிற்றம் பலம் தொடக்க வேளாண்மை கூட்டுறவு சங்கத்தின் அங்காடிகளில் உள்ள அனைத்து பதிவேடுகளையும் முழு ஆய்வு செய்து, குறைவாக ரேசன் அரிசி வழங்கிய நபர்களுக்கு அந்த அரிசியினை மீண்டும் வழங்க நடவடிக்கைகள் எடுக்க வேண்டுமென தமிழக முதலமைச்சர், தஞ்சை மாவட்ட கலெக்டர் மற்றும் பட்டுக்கோட்டை வட்ட வழங்கல் அலுவலர் ஆகியோருக்கு திருச்சிற்றம்பலம் பகுதியில் உள்ள குடும்ப அட்டைதாரர்கள் கோரிக்கை மனு அனுப்பி உள்ளனர்.